Ilang Dahilan ng Migrasyon sa Loob at Labas ng Pilipinas
Copyright by Marissa G. Eugenio/MyinfoBasket.com
Mula noong huling bahagi ng ika-20 na siglo, ang pagbangon ng globalisasyon ay nagpabago ng konsepto ng migrasyon.
Ang mga pag-unlad sa mga sistema ng transportasyon, komunikasyon, at pananalapi ay nagpadali para sa mga tao na lumipat upang magtrabaho sa ibang bansa ngunit nakapagsusustento pa rin para sa kanilang naiwang pamilya sa pamamagitan ng pagpapadala ng kanilang mga kita sa kanilang sariling bansa.
Para sa mga epekto ng migrasyon, panuorin ang educational video. Nota: Para magkaroon ng FULL ACCESS sa video, mag-SUBSCRIBE muna (kung hindi ka pa naka-subscribe):
Narito naman ang ilan sa mga dahilan ng migrasyon sa loob at labas ng bansa:
1. Upang takasan ang persekyusyon o pag-uusig dahil sa rasa, relihiyon, nasyonalidad, o pagiging miyembro ng isang partikular na grupong panlipunan o pampolitika.
Sa maraming bansa gaya sa Estados Unidos, ang mga pamilya at mga indibidwal na nakatutugon sa pamantayang ito ay maaaring makakuha ng estadong refugee o asylum.
Ganito ang kaibahan ng dalawa: kailangang maisiguro ng mga ‘refugee’ ang kanilang gayong katayuan o estado bago pumasok ng bansang napili; habang ang mga ‘asylum seekers’ ay nag-a-apply ng gayung estado pagdating sa isang bansa.
2. Upang makatakas sa labanan o karahasan
Sa maraming bansa (subalit hindi sa Estados Unidos), ang mga pamilya at mga indibidwal na dumarayo upang makatakas sa mga labanan at karahasan ay maaaring pagkalooban ng estadong refugee o asylum.
3. Upang makahanap ng kanlungan matapos makaranas ng mga suliraning pangkapaligiran
Ang mga natural na kalamidad gaya ng pagguho ng lupa at iba pang mga pangkapaligirang salik na dulot ng climate change ay tunay na banta na nakakaapekto lalo na sa mga tao na namumuhay sa kahirapan. Katunayan, iniulat ng Christian Aid na isang bilyong tao ang maaaring mailipat sa mga susunod na 50 taon dahil sa paglala ng epekto ng climate change.
4. Upang maghanap ng mas mahusay na pangangalaga sa kalusugan (health care)
Nagsisikap na lumipat sa ibang nasyon ang mga nakatira sa isang bansa kung saan limitado ang akses sa pangangalaga sa kalusugan, lalo na ang mga natatakot na magkaroon ng malalang suliranin sa kalusugan.
5. Upang takasan ang kahirapan
Ito marahil ang pinakakaraniwang dahilan ng pandarayuhan. Maraming tao ang nagpapasyang lumipat ng lugar upang magkaroon ng mas mabuting buhay.
Ang migrasyon ay maaaring internal lamang (sa loob ng bansa) o eksternal (palabas ng isang bansa). Ang mga paglalakbay na hindi naglalayong manirahan sa pupuntahang dako ay hindi itinuturing na migrasyon.
Ang ilang halimbawa nito ay ang pagtuturista, pilgrimage (paglalakbay sa itinuturing na banal na dako), at pangnegosyong paglalakbay.
Para sa diskusyon ng mga mag-aaral mula sa iba’t ibang paaralan, tingnan ang comment section sa ibaba ng www.OurHappySchool.com.